नाट्य वाचन हा प्रकार एके काळी मराठीमध्ये चांगलाच रुळला होता. जसजसा नाटकाचा कालावधी कमी होत गेला तसतसा हा प्रकारही मागे पडला. चार-पाच अंकी नाटके तीन अंकी झाली. मग दोन अंकी झाली. त्यांच्याही हळू हळू एकांकिका होत गेल्या. पण त्यानंतर पुन्हा एकदा एकांकिकांचा कालावधी लेखकांना पुरेनासा झाला. आणि त्यातून दीर्घांक लेखन होत गेले.
या सगळ्या काळात सकस नाट्यवाचन मात्र मागेच राहिले. पंधरा वीस मिनिटांची किंवा एकांकिकांची नाट्यवाचने कधीमधी होऊ लागली. परंतु सलग संपूर्ण नाट्यानुभव देणारे दीड-दोन तासांचे नाट्यवाचन मात्र अभावानेच दिसू लागले.

आयपार आंतरराष्ट्रीय नाट्य महोत्सवाच्या निमित्तानं तीन वर्षांपूर्वी आपण कै. कुमार जोशी स्मृती प्रित्यर्थ नाट्यवाचन स्पर्धा सुरू केली. गेल्या तीन वर्षांच्या अनुभवांती असं लक्षात आलं की नाट्यवाचन या कलेचा आपल्याला काहीसा विसर पडला आहे. आणि परीक्षकांच्या सूचनेनुसार यंदाच्या वर्षी आपण नाट्यवाचन कार्यशाळा आयोजित करतो आहोत.
यंदाच्या वर्षी या कार्यशाळेत अश्विनी गिरी आणि अनिरुद्ध खुटवड हे दोघेजण मार्गदर्शन करणार आहेत.